सामुहिक अत्याचारात जळगावच्या दोघांना एमआयडीसी पोलिसांनी केली अटक

अहमदनगर प्रतिनिधी (२१ नोव्हेंबर):-अनाथालयातील तरूणीवर शिर्डी येथील हॉटेलमध्ये कामाला असलेल्या तरूणांनी अत्याचार केल्याचे समोर आले आहे. एमआयडीसी पोलिसांनी जळगावच्या दोन तरूणांना अटक केली आहे.त्यांना न्यायालयासमोर हजर केले असता सखोल तपासासाठी बुधवार (ता. २३)पर्यंत पोलिस कोठडी सुनावली आहे.अहमदनगर शहरातील एका अनाथालयात राहत असलेली तरूणी रागाच्या भरात जुलै महिन्यात शिर्डीला निघून गेली होती. ती शिर्डी मंदिर परिसरात एकटीच राहत होती. तिच्या असहाय्यतेचा गैरफायदा घेऊन पाच जणांनी तिच्यावर अत्याचार केला. या तरूणीवर जिल्हा शासकीय रूग्णालयात उपचार सुरू आहेत. तिने दिलेल्या जबाबावरून पाच जणांविरूध्द येथील एमआयडीसी पोलिस ठाण्यात सामुहिक अत्याचाराचा गुन्हा दाखल करण्यात आला आहे.पोलिस अधीक्षक राकेश ओला, अप्पर अधीक्षक स्वाती भोर,उपअधीक्षक ग्रामीण विभाग अजित पाटील यांनी घटनास्थळाला भेटी देऊन तपासाबाबत मार्गदर्शन केले होते.सहाय्यक निरीक्षक युवराज आठरे यांच्या मार्गदर्शनाखाली पोलिस उपनिरीक्षक दीपक पाठक या गुन्ह्याचा तपास करीत आहेत.शिर्डी येथे हॉटेलमध्ये काम करणाऱ्या तरूणांनी या तरूणीवर अत्याचार केल्याचे समोर आले आहे. हे तरूण जळगाव जिल्ह्यातील असून ते शिर्डीमध्ये राहत होते.त्यांनी गुन्ह्याची कबुली दिली असून त्यांना या गुन्ह्यात अटक करण्यात आले आहे. त्यांच्याकडे चौकशीसाठी न्यायालयाने २३ नोव्हेंबरपर्यंत पोलिस कोठडी सुनावली आहे. आरोपींचे नावे प्रसिध्द करण्यास मात्र पोलिसांनी नकार दिला आहे.इतर आरोपींचा शोध सुरू आहे.